Ӱлӱрген айдыҥ 24-25 кӱндеринде Москва калада Тӧрӧл тилдиҥ ӱредӱчилери ортодо Текшироссиялык мастер-класстыҥ ӱчинчи бӧлӱги ӧткӧн. Алтай Республиканаҥ бу конкурстыҥ јеҥӱчилдери  болуп Баграшева Юлия Карандашевна, Республикан классический лицейдиҥ алтай тил ле литератураныҥ ӱредӱчизи,  Чербыкова Ырыс Чолтоевна,  Яконур јурттыҥ орто ӱредӱлӱ школыныҥ баштамы класстардыҥ ӱредӱчизи айттыру бичиктер алган.

Быјыл ӧткӧн Текшироссиялык мастер-класста башка-башка јерлердеҥ 318 ӱредӱчи турушкан. Конкурстыҥ жюризиниҥ талдаганы аайынча јеҥӱчилдерди кайралдаарга ороонныҥ тӧс калазына 18 јеҥӱчил ле 12 туружаачыны кычыргандар.

Конкурстыҥ калганчы бӧлӱгинде  Гран-при кайралды чуваш тилдиҥ ӱредӱчизи Краснова Нелли Анатольевна (Новочебоксарск кала) алды.

Алтай Республиканаҥ барган ӱредӱчилер эки номинацияда јеҥӱчилдер болуп чыккан. «Ӱредӱчи-мастер» деп номинацияда баштапкы дипломло Баграшева Юлия Карандашевна (Республикан классический лицей), «Јурт јердиҥ ӱредӱчизи» деп номинацияда ӱчинчи дипломло Чербыкова Ырыс Чолтоевна (Яконур јурттыҥ орто ӱредӱлӱ школы) кайралдаткандар.

 

Уткуп турубыс!