Ӱлӱрген айдыҥ 20-чи кӱнинде Алтай Республиканыҥ ӱредӱчилериниҥ билгирин бийиктедер ле такып профессионал ӱредӱ берер институтта Алтай тилдиҥ кӱнине учурлай байрамдык мероприятилер ӧтти.

Алтай тилдиҥ баштапкы методизи, профессор Н. Н. Суразаковага  учурлай тургузылган мемориал досконыҥ јанында митингте институттыҥ ишчилери, педагогический ле политехнический колледжтердиҥ ӱредӱчилери ле студенттери турушты. Институттыҥ билим-методикалык иш аайынча проректоры А. А. Иркитова, республикан лицейдиҥ алтай тилдиҥ ӱредӱчизи Ю. К. Баграшева, педагогический колледжтиҥ алтай бӧлӱгиниҥ јааны М. Ю. Анышева митингтиҥ туружаачыларын Алтай тилдиҥ кӱниле уткып, Н. Н. Суразакованыҥ алтай тилди шиҥдееринде, оны школдо ӱредеринде учуры, бӱдӱрген ижи керегинде оморкодулу сӧзин айттылар. Нина Николаевнаныҥ бичиктери, билим-методикалык иштери эмдиги ӧйдиҥ бичиктерин тургузарында, ӱредӱде билим-методикалык тӧзӧгӧ болуп турганы јолду темдектелди. Митинг билимчиниҥ доскозына чечектер салганыла тӱгенди.

Институтта «Алтай тилдиҥ тӱӱкизинеҥ» деп кӧрӱ, анайда ок эмдиги ӧйдиҥ ӱредӱ бичиктердиҥ, билим-методикалык литератураныҥ кӧрӱзи элбек ле келген улуска јилбилӱ болды.

«Алтай тил ле литератураны школдо ӱренери» деп консультационный площадка ада-энелерге баштапкы катап ӧткӱрилди. Ондо ада-энелер, ӱредӱчилер, ӱредӱ бичиктердиҥ авторлоры турушты. Алтай тилди ле литератураны ӱредериниҥ методиказыныҥ кафедразыныҥ јааны Ж. И. Амырова алтай тилле ӱредӱ-методикалык комплекстерле таныштырып, оныла иштеери аайынча куучын айтты. Институттыҥ оргметод бӧлӱгиниҥ јааны С. В. Абысова ӱредӱ бичиктердиҥ электрон бӱдӱмиле канайда иштеери јанынаҥ јетирӱ этти. Алтай тилди ле литератураны ӱредериниҥ методиказыныҥ кафедразыныҥ методизи А. С. Шокшиланова  ада-энелер балдарына алтай тилди ӱренерине болужын јетирзин деп, текстле иштеериле  практика иш бӱдӱртти.

Анайда ок туружаачылар «Кереес ӱндер» деп виртуал экскурсия ажыра алтай бичиичилердиҥ ле поэттердиҥ ӱлгерлерин бойлоры ла актерлор кычырганын угуп, тӧрӧл тилиниҥ јаражын, чеченин база катап кӧксине алып, оморкодылар.

Ада-энелер тӧрӧл тилин бала билери ле сӱӱри озо ло баштап биленеҥ камаанду деп санаа-шӱӱлтезин айттылар. Ада-энелерге ачык эрмек-куучында турушканы учун быйанду сӧстӧр, институттыҥ ишчилерине ижин эрчимдӱ улалтсын деп кӱӱнземелдер  айдылды.

DSC_1572
DSC_1572
DSC_1577
DSC_1577
DSC_1593
DSC_1593
DSC_1601
DSC_1601
DSC_1603
DSC_1603
DSC_1607
DSC_1607
DSC_1615
DSC_1615
DSC_1618
DSC_1618
DSC_1620
DSC_1620
DSC_1626
DSC_1626
DSC_1627
DSC_1627
DSC_1679
DSC_1679
DSC_1704_1
DSC_1704_1
Previous Next Play Pause
1 2 3 4 5 6 7 8 9 10 11 12 13