Алтай Республиканыҥ ӱредӱ ишчилериниҥ билгирин бийиктедер ле такып профессионал  ӱредӱ берер институт 2017 јылдыҥ кӱӱк айыныҥ  23-чи кӱнинде М. В. Чевалковтыҥ адыла адалган Эл библиотекада ӧткӱрилип јаткан «Алтайдыҥ бичиктери» деп фестивальда 2016 јылда кепке базылган ӱредӱ-методикалык бичиктердиҥ Презентациязын ӧткӱрди.

Келген айылчылардыҥ ортозында ӱренер бичиктер ле  ӱредӱчиге болушту бичиктердиҥ  авторлоры ла алтай тил ле литератураныҥ ӱредӱчилери болды.

Таныштыру ӧйинде «Ӱренер бичиктердиҥ тӱӱкизинеҥ» деп видео-материал кӧргӱзилди. Бу кӧргӱзӱде алтай тил ле литератураныҥ ичкери ӧзӱмине јаан камаанын јетирген билимчилердиҥ Н. П. Дыренкованыҥ, Н. А. Баскаковтыҥ, Т. М. Тощакованыҥ, Н. Н. Суразакованыҥ, З. С. Казагачеваныҥ, А. Т. Тыбыкованыҥ ла оноҥ до  ӧскӧлӧриниҥ  јаан тузалу иш эткени керегинде айдылган. Олордыҥ ижине тайанып, эмдиги ӧйдиҥ некелтелериле јаҥы бичиктер тургузылганы  айдылган.

 

 Аҥылу ајаруда «Алтай тил», «Литературалык кычырыш» (1-4 класстарга)  электрон бӱдӱмдӱ ӱренер бичиктер болды. Мындый бӱдӱм бичиктер баштапкы катап тургузылган, мында мультимедийный обьекттер ле интерактивный јакылталар кийдирилгени ӱредӱчиниҥ ле ӱренчиктердиҥ  ижинде эптӱ ле тузалу деп темдектелди.

Авторлордыҥ јаан ла тузалу ижин баалап, «Таныспай Шинжинди кычыралы» деп хрестоматияныҥ автор-тургузаачызына, Бичиичилер Биригӱзиниҥ членине Т. Б. Шинжинге, ӱредӱчилерге  болушту «Алтай литератураныҥ сурактары» деп бичиктиҥ авторына, филология билимдердиҥ докторына, Горно-Алтайсктыҥ эл университединиҥ профессорына, Н. М. Киндиковага, баштамы класстарга тургузылган «Алтай литература» хрестоматияныҥ авторына Г. Н. Акуновага, А. В. Беляковага,  электрон бӱдӱмдӱ бичиктердиҥ авторлорына К. К. Пиянтиновага, Н. Б. Тайборинага, А. В. Самтаковага, А. В. Беляковага, Н. Н. Сабинага, А. Б. Тадыровага,  М. А. Барантаевага, Е. А. Мегедековага, Т. В. Метреевага, кичинек балдарга кычырар «Арба кылгада» деп јуунтыныҥ авторына, педагогикалык билимдердиҥ кандидадына Е. Н. Тобоевага  Алтай Республиканыҥ ӱредӱ ишчилериниҥ билгирин бийиктедер ле такып профессионал  ӱредӱ берер институт быйанду самаралар берди, јуулган улус быйанын айттылар, ижинде једимдер кӱӱнзедилер.

Презентацияныҥ туружаачылары Т. Б. Шинжинниҥ, К. К. Пиянтинованыҥ, Н. М. Киндикованыҥ, Г. Н. Акунованыҥ, Е. Н. Тобоеваныҥ куучынын јилбиркеп уктылар.

Туштажуда авторлор ло айылчылар бойыныҥ јылу уткуулду сӧстӧрин айдып, ӧдӱп јаткан иш учурлу, турулталу болгонын темдектедилер.

 

Фотоjуруктар